Den e ultimo añanan por a mira un expansion di e oportunidadnan comercial entre Aruba y Colombia. Jan Willem van Bokhoven, director di Holland House ta promove comercio, inversion y intecambio entre Reino Hulandes y Colombia. Dus, tambe entre Aruba y Colombia. Esaki ta nifica cu nan ta apoya e empresarionan Rubiano cu tin interes den Colombia y nan ta apoya e empresarionan Colombiano cu kier expande pa Aruba, cu ta algo hopi positivo.

Mundialmente tin desafio, pero si mira e comercio entre Aruba y Colombia aña pasa a crece cu 6%. Exportacion di Colombia pa Aruba a yega 42 miyon dollar. E relacion entre Aruba y Colombia ta super positivo.  Ainda tin espacio pa crece di ambos banda. Mas turismo, mas exportacion di Colombia pa Aruba, mas productonan Colombiano cu no ta conoci na Aruba. C’un miho logistica y un trabou miho organisa, por logra mucho mas, Bokhoven a bisa. Pero, cada biaha tin mas empresanan Rubiano cu ta interesa pa promove nan servicio y portofolio na Colombia, cu ta un mercado grandi y por logra hopi eynan. 

Mas aleu, van Bokhoven a indica cu Colombia ta enfrentando algun desafionan riba tereno di turismo. Y kisas Aruba lo por exporta e conocimento di e isla den e ramo aki pa e region. Colombia cada biaha ta mas popular. Aña pasa el a ricibi como 6 miyon turista y esaki ta nifica tambe cu pa prome biaha e ta enfrenta e retonan cu antes e no tabata conoce. Esey ta turismo sostenibel, ya cu turismo ta yegando den massa y esaki ta nifica cu e ciudadnan manera Medellin y Cartagena  prome biaha ta ricibiendo asina tanto turismo, cu nan mester encontra e balans entre e medio ambiente y e poblacion local. Rib’e tereno aki, Aruba tin delantera grandi riba Colombia.