Holland House in het nieuws
- Nieuws
- Detail Nieuws
By 24ora.com | 24 Maart, 2025 | Nieuws
We staan in het nieuws | Dos Rubiano awo den directiva di Holland House Colombia
Tres compania cu hopi experiencia na Colombia y Hulanda a drenta e Hunta Directiva di Camara di Comercio Hulandes-Colombiano, conoci como Holland House Colombia, fortificando di e manera aki e conexion comercial entre e paisnan. A haci e anuncio aki durante e di 13 “Asamblea Ordinaria de Afiliados”, cu a tuma luga diaranson siman pasa, esta dia 19 di maart 2025.
E miembronan nobo di e Hunta di Directiva ta:
- Karime Amaya Vélez – Lider Nacional y Comercial pa Colombia y Puerto Rico na Philips Colombia, un compania Hulandes cu un trayecto solido den e pais.
- Wouter Gregorowitsch – Gerente Regional di Air France-KLM, un compania di aviacion cu ya tabata miembro di Hunta di Directiva, pero awo tin un representacion nobo.
- Xiomara “Milly” Paskel-De Cuba, CEO di First Class Experience Colombia, un compania funda na Aruba na aña 2016 cu presencia na Cartagena y Bogotá desde aña 2019. Nan ta ofrece servicio di compañamento VIP na aeropuertonan na Colombia.
E miembronan nobo aki a join esnan cu ya tabata den e Hunta di Directiva:
- Ángela Liliana Sánchez – Presidente di e Hunta y partner na PricewaterhouseCoopers (PwC)
- Willem Jonckheer – Miembro di directiva di Camara di Comercio di Corsou
- Alfonso Plana – Partner na ARI Consulting Group
- José Manuel Jaramillo – Gerente General di Fagron Colombia
- Jordan Schlipken-Croes, director di Aruba Tourism Authority Latino America, basa na Colombia
- Nicolás Tobón – CEO di Makro Colombia.
“Bonbini“
“Nos ta contento di tin un Hunta di Directiva fuerte cu ta representa e companianan di tur tamaño y sector. E hunta nobo aki lo permiti nos fortalece nos vision cu strategianan cu ta impulsa crecemento di nos comunidad empresarial y desaroyo comercial entre Colombia y Reino Hulandes”, asina Jan Willem van Bokhoven, Director Ehecutivo di Holland House Colombia, a expresa.
Uni den Reino Hulandes
Camara di Comercio Hulandes-Colombiano, conoci como Holland House Colombia, ta un organisacion dedica na conecta e companianan di Colombia y Reino Hulandes, cu e meta pa fortalece e lasonan comercial, sostene crecemento di negoshi y duna sosten na e empresarionan. Holland House Colombia a establece su mes como e di dos Camara di Comercio mas grandi na Colombia pa loke ta trata miembresia, cu 462 compania afilia di Reino Hulandes y Colombia y ta e Camara di Comercio Hulandes mas grandi na nivel mundial!
Siña mas tocante Holland House Colombia na: https://hollandhouse-colombia.com.
Den e prome dies añanan
Dos aña pasa a celebra nan aniversario, enfocando riba e vision pa sigui crece entre companianan di Aruba, Corsou, Sint Maarten y Hulanda cu ta interesa den inverti na Colombia. E organisacion a yuda mas di mil negoshi caba y ta conta cu den e ultimo decada, negoshinan Colombiano a inverti mas di 5 biyon dollar Mericano den economia di Aruba, por ehempel.
Colombia a haya e prome Holland House
Tur cos a cuminsa como algo chikito, pero tabata esun prome di mundo. Awendia tin mas di 20 di e organisacionnan aki, situa den varios pais den Latino America y otro continentenan rond mundo. Ta bon pa subraya, cu Holland House Colombia ta e di dos organisacion comercial bilateral mas grandi na Colombia, despues di e organisacion di negoshinan Mericano. Esaki ta demostra e importancia cu Colombia mes como pais ta duna na inversion Hulandes y e determinacion di companianan for di Aruba, Corsou y Hulanda pa inverti na Colombia. Entretanto e organ
isacion Colombiano ta conta cu 462 miembro caba y a crece enormemente durante y despues di e pandemia.
Holland House Colombia a nace na aña 2013
Jan Willem van Bokhoven, director di Holland House Colombia, a splica cu Holland House a habri dia 1 di juni 2013. Na aña 2011/2012 a cuminsa traha riba e idea, pero na aña 2013 nan a cuminsa chikito. Tempo a cuminsa cu Holland House, e team tabata di dos persona, pero awendia nan ta surpasa 30 persona. Tin un total di 462 afiliado y nan ta sostene mas di mil empresa den tur loke ta e relacion comercial entre Hulanda, Corsou, Aruba y Colombia.
Comercio cu Colombia ta fundamental
Den e ultimo dos pa tres aña, despues di e pandemia, e rason cu nan a crece ta cu nan a tuma nota na Hulanda como na Aruba y Corsou, cu comercio cu Colombia ta fundamental. Nos a demostra di ta un bon bisiña, mester a implusa, mester a inverti, pa promove mas comercio entre e paisnan. A ripara riba e importancia cu Colombia tin tanto na Hulanda como e paisnan den Caribe Hulandes. E crecemento ta bin di esey, pasobra e echo cu nos ta cerca, nos ta domina e idioma Spaño, cu nos conoce e cultura Colombiano, a haci cu ta mas facil traha cu otro akibanda.
Hulanda tin mas miembro
Mayoria miembro di Holland House Colombia ta negoshinan di Hulanda, pero e grupo di Caribe Hulandes a cuminsa crece lihe. Entre esnan cu ta afilia ta yegando como 15 compania di Aruba, 5 di Boneiro y 35 di Corsou, cu hunto ta suma 50 compania. E grupo di e islanan ta creciendo y esey ta importante pa nan!
Varios inversion Colombiano na Aruba
E inversion di Colombia pa Aruba a crece hopi den e ultimo dies añanan, ta papia di riba cinco biyon dollar Mericano. Por mira esey den tanto exportacion y inversion di Colombia den e islanan di Caribe Hulandes ta creciendo. Tradicionalmente esey a pasa mas den e sector di turismo, pero na Colombia tin interes den otro sector manera energia renobabel y hopi mas.
Aruba ta mira oportunidad den Colombia
Pa Camara di Comercio e trabou cu Holland House ta desplega pa facilita comercio entre e dos paisnan ta algo di aprecia y promove. Despues cu siman pasa tabatin un evento cu e mision comercial organisa pa e mesun Camara di Comercio di Aruba hunto cu di Minister di Economia y DEACI na Bogota, por mira awor mas acercamento di comercio di Aruba y Colombia. Esey ta loke Camara di Comercio kier fomenta, mas comercio entre e dos paisnan.
Tocante Holland House
E organisacion comercial Hulandes esta Holland House ta e brug cu ta conecta e empresanan y e organisacionnan di Colombia y e paisnan di Reino Hulandes, cu e obhetivo pa duna un impulso na crecemento empresarial. Holland House ta un aliado strategico pa e doñonan di compania cu a tuma un decision pa inicia cu relacion comercial y di inversion na Colombia, Caribe y Europa. Holland House a logra un posicionamiento comercial pa su afiliadonan y su clientenan pa medio di crea encuentro comercial, promociona desaroyo empresarial y organisa evento cu ta haci un impacto.
Holland House ta e di dos Camara di Comercio binacional mas importante na Colombia despues di Merca y na mes momento a logra posiciona den e top tres di e Camaranan Comercial Hulandes cu mayor reconocemento na mundo. Actualmente Holland House ta conta cu 462 compania afilia y tambe a conseha mas di 1000 compania den proceso pa internacionalisa. Holland House a habri dia 1 di juni 2013 na Colombia. Ademas Colombia ta e prome pais pa conta cu un Holland House, cu ta un seccion comercial-economico bou di e hala diplomatico di Reino Hulandes.
Tin como 20 Holland House rond mundo, pues separa di Colombia tin tambe na Costa Rica, Panama, Peru, Cuba, Mexico, Chile y asina lo por sigui menciona. Na ningun di nan tin dos Rubiano den Hunta di Directiva si.
Bron: https://24ora.com/dos-rubiano-awo-den-directiva-di-holland-house-colombia/
Contactgegevens
- Cl. 90 #19-41 Oficina 801 - Chapinero Bogotá
- +57 (601) 7449566
- info@hollandhouse-colombia.com
