Holland House Colombia a marca un logro historico door di bira e prome Camara de Comercio di Reino Hulandes den exterior cu a alcansa 500 miembro. Jan Willem van Bokhoven, director di e organisacion, a destaca cu Aruba tin un presencia fuerte den e comunidad aki cu rond di 35 miembro, danki n’e colaboracion estrecho cu Aruba Tourism Authority (ATA).

E strategia p’e aña aki ta enfoca riba expansion pa ciudadnan manera Bucaramanga y Barranquilla. Segun Van Bokhoven, e meta ta pa bay mas leu cu e mercadonan tradicional di Bogotá y Medellín, buscando pa stimula inversion y fluho comercial nobo cu ta beneficia e relacion entre Colombia y e isla.

Di su banda, Jordan Schlipken-Croes, Director di ATA pa Latino America, a resalta cu Aruba tin mas di 50 aña di presencia na Colombia. El a splica cu e conectividad actual cu ciudadnan manera Cali, Barranquilla y Bucaramanga tin un meta cu ta transcende turismo. E enfoke principal ta pa facilita e intercambio di mercancia y e reencuentro di famianan.

E expansion di e rutanan aereo, specialmente e vuelo directo pa Barranquilla, ta ilustra como un oportunidad clave pa importa productonan esencial manera fruta, berdura y carni pa Aruba. Ademas, e colaboracion cu Holland House ta habri porta pa un intercambio di conocemento tecnico y comercial. Cu e pasonan aki, Aruba y Colombia ta drenta un era nobo di cooperacion economico, probechando nan cercania geografico pa crea un impacto positivo y duradero den e region.

Pa mas detaye lesa TREMPAN.