Holland House in het nieuws
- Nieuws
- Detail Nieuws
By 24 ora.com | 26 Februari, 2026 | Nieuws
We staan in het nieuws | Holland House Colombia: Den tur sector di Colombia tin interes den Aruba
Un partner importante di Aruba pa algun aña caba ta Holland House Colombia. Via di e oficina aki ta haci e contactonan pa posibel conexion comercial na Colombia. Jan Willem van Bokhoven, director, a confirma e bon relacion cu ta existi.
Incluso el a confirma cu aña pasa (2025) nan a ricibi hopi bishita for di Aruba. Pero no solamente tabatin mision di Aruba pa Colombia pero vice versa tambe. Pues e ta conclui cu e interes ta bini di ambos banda y a enfatisa cu e no ta papia solamente di turismo. “For di tur sector tin interes den e diferente misionnan, den siguridad di alimento, compra di combestible, sostenibilidad y hopi mas,” van Bokhoven a comenta.
E funcionario ta sinti cu e trabou cu nan como Holland House Colombia ta haci, ta dunando resultado. Nan tin como 25 miembro registra cu ta di Aruba. E instancia aki ta un ayudo grandi pa diversificacion di servicionan cu e empresanan di Aruba ta brinda.
E aña’ki ta mas importante ainda pasobra ta celebra e 200 aña di relacion entre Aruba y Colombia. Pues esaki lo mester percura pa hopi mas beneficio pa ambos banda. E agenda di 2026 lo ta uno basta amplio cu basta actividad. Di diferente forma lo bay mustra con e lasonan aki a cuminsa y con e ta awendia.
Aunke cu tin cierto obstaculo ainda den e relacion comercial, e ehecutivo di Holland House no ta kere cu esaki ta un problema. Den ultimo añanan por a nota con a mehora e situacion y poco-poco a habri caminda. Hopi di loke awe ta bon, ta pasobra a haci avance den ultimo añanan. Holland House ta yuda e comerciantenan perde menos tempo door di haci e conexion pa e productonan cu nan ta busca. Y a traha pa mehora e logistica, unda ta haci hopi mas uzo di e via aereo cu esun maritimo. Y esaki ta posibel na miho conexion maritimo pero tambe mas posibilidad aereo, e.o. pa cu carga. E no ta nenga cu tin mas tema pa traha riba nan, manera e proceso di Aduana.
Algo cu Holland House ta trata pa yega na un acuerdo riba dje, ta e importacion di carni di Colombia pa Aruba. E ta algo cu Corsou a logra caba. Husto na e momentonan aki tin dos importado grandi di carni na Colombia pa mira con e situacion ta avansando. Por bisa cu awo ta practicamente sperando solamente riba e permisonan necesario.
Tocante Holland House
E organisacion comercial Hulandes esta Holland House ta e brug cu ta conecta e empresanan y e organisacionnan di Colombia y e paisnan di Reino Hulandes, cu e obhetivo pa duna un impulso na crecemento empresarial. Holland House ta un aliado strategico pa e doñonan di compania cu a tuma un decision pa inicia cu relacion comercial y di inversion na Colombia, Caribe y Europa. Holland House a logra un posicionamiento comercial pa su afiliadonan y su clientenan pa medio di crea encuentro comercial, promociona desaroyo empresarial y organisa evento cu ta haci un impacto.
Holland House ta e di dos Camara di Comercio binacional mas importante na Colombia despues di Merca y na mes momento a logra posiciona den e top tres di e Camaranan Comercial Hulandes cu mayor reconocemento na mundo. Actualmente Holland House ta conta cu 382 compania afilia y tambe a conseha mas di 1000 compania den proceso pa internacionalisa. Holland House a habri dia 1 di juni 2013 na Colombia. Ademas Colombia ta e prome pais pa conta cu un Holland House, cu ta un seccion comercial-economico bou di e hala diplomatico di Reino Hulandes.
https://24ora.com/holland-house-colombia-den-tur-sector-di-colombia-tin-interes-den-aruba/
Contactgegevens
- Cl. 90 #19-41 Oficina 801 - Chapinero Bogotá
- +57 (601) 7449566
- info@hollandhouse-colombia.com
